Kuido di hende grandi ta un punto di atenshon pa henter e komunidat di Kòrsou. Fundashon Birgen di Rosario ta invitá tur hende pa duna un kontribushon. Boluntarionan ta di balor inkalkulabel: un kombersashon agradabel, partisipá na aktividatnan òf yuda den eventonan ta hasi diferensia pa e bienestar di grandinan i ta yuda prevení soledat.
Sostené nos
Banda di trabou boluntario, sosten finansiero di mes ta bonbiní. Supsidio di gobièrnu no ta kubri tur gastu, dor di kua donashon ta esensial pa garantisá e kuido, mantenshon di e edifisionan i e desaroyo di e personal. Empresa i partikularnan por kontribuí pa medio di donashon di produkto manera ròlstul, kamanan di hòspital òf material di enfermeria. Tambe por depositá un montante riba MCB nr. 32021610 na nomber di ‘Stichting Birgen di Rosario’ bou di menshon di ‘Donashon’.
Tur forma di sosten – tempu, atenshon òf kontribushon finansiero – ta yuda nos pa ofresé nos grandinan un ambiente di bida aktivo, sigur i signifikante.
