Pasadia

Nos sentronan di aktividat, tantu na Pasadia Mi Amparo ku n Richardushuis, ta sostené grandinan ku ta biba na kas i ku durante dia mester di kuido, guia i aktividatnan sosial. Aktividatnan rekreativo ta yuda hende grandi keda mental i físikamente aktivo i ta prevení isolamentu sosial. Diariamente nos ta sòru pa kuminda saludabel i nos ta kontrolá regularmente peso, preshon di sanger i pòls. Den situashonnan di nesesidat i urgensia ta embolbí e médiko di fundashon. Asina nos grandinan ta keda aktivo, embolbí den nos komunidat i por keda biba mas largu riba nan mes na kas.

Nos ta ofresé un ambiente sigur i stimulante ku personal spesialisá ku ta pèrkurá pa kuido personal unda ta nesesario i sosten ora di tuma remedi. Aktividatnan den un sentro no solamente ta bon pa e hende grandi, sino ta tambe un sosten balioso pa nan kuidadónan informal (‘mantelzorgers’): e ta ofresé nan espasio pa rekarga nan mes òf pa kumpli ku otro obligashonnan, sabiendo ku nan ser kerí ta den bon man.