22 Sep Dia Mundial di Alzheimer
En konekshon ku Dia Mundial di Alzheimer tabatin un seminario grátis tokante Alzheimer riba dia 21 di sèptèmber na World Trade Center Curaçao. Durante e seminario diferente orador a duna informashon sientífiko i tepnan práktiko pa prevení demensia. Dos kuidadó di personanan ku demensia tambe a konta kon nan ta eksperensiá Alzheimer den nan bida diario.
E seminario aki tabata organisá dor di Stichting Wit Gele Kruis voor Thuiszorg “Prinses Margriet”, Stichting Birgen di Rosario i Stichting Alzheimer Curaçao, kual a firma un akuerdo di kolaborashon pa oumentá konsientisashon i prevenshon di demensia na final di e seminario. Haydée Clementina, presidente di Stichting Alzheimer Curaçao, a entregá dos ehemplar di World Alzheimer Report 2018 na Minister Hensley Koeiman (SOAW), ya e por entregá un ehemplar na Minister Suzy Camelia-Römer (GMN), ku no por ta presente debí na otro kompromiso. E rapòrt aki ta publiká dor di Alzheimer’s Disease International (ADI) i ta konsistí di resultadonan di diferente investigashon tokante demensia. Den e rapòrt ADI ta hasi un yamada na tur gobièrnu pa invertí mas fondo pa por hasi investigashon sientífikotokante demensia.
E tema di e seminario tabata “kada tres sekònde”, pa pone énfasis ku kada tres sekònde un persona mas ta desaroyá e malesa di demensia. Haydée Clementina di Stichting Alzheimer Curaçao a duna tepnan práktiko pa prevení demensia.Drs. Rachidah Griffith, ku ta traha komo internista i “endocrinoloog” na Sint Elisabeth Hospitaal (SEHOS), a duna informashon sientífiko tokante e relashon entre diabétes i Alzheimer. Den pousa bishitanten por a haña informashon di e tres fundashon i Music Therapy Center Curaçao, i mientras tantu disfrutá di muzik presentá pa Music Therapy Center Curaçao en kolaborashon ku Capriles Kliniek i SEHOS.
Diferente emoshon di kompashon i tristesa a resaltá den públiko ora Carin Clement i Jadira Bislick a splika kon nan ta eksperensiá Alzheimer den nan bida diario. Tur dos damas ta kuidadónan di famia ku tin demensia. E frustashon pa e persona ku demensia i su famia, e buskamentu pa informashon i guia, i e amor inkondishonal tabata tópikonan ku a bini dilanti. Carin Mercera Clement tambe a konta di su historia komo un hende ku a wòrdu diagnotisá resientemente ku demensia i apesar di esei tambe tin otro malesa. Marjon Halmeyer-Roos, fundadó di Music Therapy Curaçao, a klousurá e anochi ku informashon di terapia di muzik pa personanan ku demensia.