Nos Organisashon

Fundashon Birgen di Rosario ya pa 82 aña ta duna kuido kaluroso i spesialisá na hende grandi na Kòrsou. Ku un tim di profeshonalnan eksperto i envolví, nos ta sostené nos grandinan ku tin diferente nesesidat di kuido: di supervishon diario i kuido te enfermeria i guia intensivo. Pasadia ku aktividatnan durante dia tambe ta un parti importante di nos kuido, di manera ku nos grandinan ku ta biba na kas ainda, ta keda aktivo, sosial i embolbí.

Nos mishon ta kla: nos ke mantené i promové kalidat di bida di nos grandinan. P’esei nos ta duna kuido profeshonal, kargá ku amor i dirigí riba e hende. Nos ta promové outo-sufisiensia i ta sostené grandinan pa mantené nan propio régimen, di manera ku nan mes por disidí mas tantu posibel riba nan bida i kuido. Nos vishon ta di imitá, na eskala chikitu, mas mihó posibel e formanan doméstiko di biba i kuido na kas. Pa medio di atenshon personal i teniendo kuenta ku kada situashon riba nan mes, nos ta krea un ambiente sigur i kaluroso unda grandinan ta bai sinti nan mes mirá i apresiá.

 

Na Fundashon Birgen di Rosario bienestar di grandinan ta pará sentral. Nos ta kombiná abilidat, eksperensia i aserkamentu personal pa ofresé un ambiente signifikativo i sigur den kua grandinan por desaroyá nan mes, gosa i sinti nan na kas.

Fundashon Bírgen di Rosario ta afiliá na Fundashon Federashon di Institushonnan di Kuido loke ta bon pa e koperashon entre e fundashonnan afiliá i interkambio mutuo di konosementu. Pa mantené e kalidat di kuido na nivel, Fundashon Bírgen di Rosario tin un Servisio Médiko ku dòkter i enfermera kapas, bou di kua un spesialista pa hende grandi, ku diariamente ta presente pa duna kuido na un promedio di 425 hende grandi. Ademas ta duna fisioterapia, terapia di egersisio i pedikür médiko di parti di profeshonalnan na habitante i bishitante di e pasadia (70 hende grandi). Banda di esei, nos tin guia di aktividat den servisio, ku ta  hasi diferente aktividat ku e grandinan. Aparte di esei, nos tin enfermero/a i asistente enfermero/a den servisio, ku di dia i anochi ta duna e kuido nesesario.

Kuido di hende grandi ta un punto di atenshon pa henter e komunidat di Kòrsou. P’esei nos ta mira komo nos responsabilidat pa hasi tur posibel pa na interes di grandinan sigurá nos kuido den futuro i sigui ofres’é na nivel.

Bo ta buskando un lokalidat pa organisá un reunion?

Nos ta hür un sala di reunion.