Nos sitionan
Huize Welgelegen
A funda Huize Welgelegen, prinsipalmente konosí komo Habaai, 13 di yanüari 1943 i e ta e kas pa hende grandi intramural mas grandi ku Fundashon Birgen di Rosario ta manehá. E kas ta situá den un konbento di ántes ku Sùrnan di Roosendaal a regalá e fundashon pa kuido di hende grandi. Meta di e kas akí ta pa ofresé kuido, reaktivashon i guia sosial na hende grandi for di 60 aña pa di e manera ei promové kalidat di nan bida riba tereno físiko, mental i sosial.
Richardushuis
A funda Richardushuis promé di mart 1954 i den pasado e tabata un kas pa hende hòmber, pero awendia ta ofresé alohamentu pa hende muhé tambe. A dediká nòmber di e kas akí na Frater Richardus, kende den pasado a hasi hopi trabou na bienestar di siudadanonan di edat.
Nos Lanterno
Nos Lanterno a habri su portanan 17 di novèmber 1985 i tin komo meta pa duna kuido, reaktivashon i guia sosial na hendenan grandi for di 60 aña pa promové kalidat di nan bida riba tereno físiko, mental i sosial.
Klooster Alverna
Kongerashon ‘Zusters Franciscanessen Penitenten Recollectinen van de Onbevlekte Ontvangenis van Maria’ a dediká nan bida na edukashon i bibienda di muchanan na Kòrsou. Na aña 1959 nan a traha Klooster Alverna pa interná muchanan. Aktualmente Fundashon Birgen di Rosario ta manehá Klooster Alverna i ta duna oportunidat na hende muhé for di 60 aña pa biba den un bisendario natural i trankil.
Pasadia Mi Amparo
Pasadia Mi Amparo a habri su portanan ofishal dia 1 òktober 1982 den e edifisio di Huize Welgelegen. E pasadia a kuminsá ku sinku hende grandi i den un temporada kòrtiku e grupo a krese i no tabata tin espasio adekuá mas pa akomodá tur e hendenan grandi.
Dia 1 di òktober 1987 Pasadia a muda bai den edifisio Mi Amparo (ántes Theresiaschool) kual a bira un sentro di kuido pa grandi, kaminda Pasadia a haña mas espasio pa tuma hende grandi durante di dia. Aktualmente Pasadia tin kapasidat pa tuma 70 hende grandi pa dia. E klientenan ku ta bishitá Pasadia ta bini di diferente bario di Kòrsou.
Bibienda independiente
Banda di e sinku lokalidatnan, Fundashon Bírgen di Rosario ta disponé di 18 bibienda independiente, ku ta keda pegá ku Huize Welgelegen. Grandinan for di 60 aña por biba independientemente i si ta deseá, partisipá na aktividatnan sosial ku e Fundashon ta organisá.