09 Oct Jerusalema Challenge

E kantika ‘Jerusalema’ ta un kantika di gòspel kaminda e artista Master KG di Sur Afrika ta pidi protekshon i guia pa bai Jerusalem, kual e ta konsiderá e kas di personanan religioso. A lansa e kantika dia 29 di novèmber 2019 i el a bira popular mundialmente un par di luna pasá ora a kuminsá ku e ‘Jerusalema Challenge’. E meta di e ‘Jerusalema Challenge’ mundialmente ta pa trese positivismo.

Tabatin diferente initiativa den Fundashon Birgen di Rosario (Birgen) pa organisá e ‘Jerusalema Challenge’ i a forma un komishon pa por realisá esaki. E komishon tabata eksistí di Urni Victoria, Margela Pieternella, Carmen Haseth-Garcia, Corriena Alberto i Danilda Pieternelle. Den luna di sèptember 2020 mas o ménos 40 kolega a partisipá tur siman den treinen di baile bou di supervishon di koreógrafo Ivan Felipa. Danki na e komishon i e koleganan aki ku por a kreá algu úniko i esaki tabata un oportunidat pa empleadónan di Birgen uni mas!