Enkuentro chikí: tokante soledat i intimidat bou di nos grandinan

Riba un merdia den siman e chèns ta grandi ku Servio ‘Boy’ Lannoy (77), loodgieter di profeshon i un kara konosí riba terenonan di Fundashon Birgen di Rosario, ta sintá dilanti di e toko banda di su kas. No pasobra e tin kos pa kumpra, pero pasobra einan e ta topa su konosínan; sea hende di bario òf koleganan di ántes. “Mi a traha hopi aña den konstrukshon. Hopi hende konosé mi di ántes. Tambe paso ami ku mi ruman hòmbernan tabata músiko konosí bou di esnan ku tabata bai fiesta di kaha di òrgel. Ora ku hendenan rekonosé mi, mayoria bes mi ta hala un kombersashon chikitu,” Lanoy ta bisa. Tras di e momentu kasi lógiko akí, tin un strategia sabí skondí: un manera efektivo pa un hende grandi keda konektá ku komunidat i evitá ku e ta kai den soledat.

No opstante patronchinan di pensamentu persistente, soledat no ta pertenesé na embehesimentu. Isolamentu sosial ráramente ta originá di un dia pa otro. E ta mayoria bes un proseso largu ku, hopi biaha sin ripará, ta avansá pa motibu di e echo ku e manera ku nos ta keda den konekshon ku otro hende ta kambia. Pa un tiner promedio e ret sosial ta konsentrá dentro di kurá di skol òf su klup di deporte. Asina ku un hende kuminsá ku su karera laboral, e enfoke ta move pa su trabou i famia. E periodo aki hopi biaha ta largu – spesialmente kompará ku e añanan di infansia i tiner – poniendo ku bo ta inkliná di pensa ku e relashonnan aki ta sigui eksistí di mes. Tòg e relashonnan aki ta kambia na sierto momentu. Yunan ta sali for di kas i ta forma nan mes famia. Na Kòrsou tin ku tene kuenta ku un dimenshon èkstra: hopi hóben ta bai studia den eksterior, poniendo ku e proseso aki ta kuminsa mas trempan. Kombersashon ku otro mayornan tokante ‘carpool’ ta disparsé i e ret sosial ta limitá su mes mas i mas riba tereno di trabou. Ora ku un persona kai adelantá for di tereno di trabou debí na enfermedat, òf bai ku penshun, e ret sosial ta bira atrobe mas chikitu. Si bo no traha aktivamente pa forma konekshonnan nobo, e chèns ta grandi ku bo ta kai den un isolamentu sosial.

E ret sosial ku poko poko ta disparsé

Marbella Pieter-Ogenia, kende a traha 46 aña na Fundashon Birgen di Rosario i pa dékadanan largu ta traha komo boluntario, e delaster añanan entre otro den e proyekto Huntu Grandi Den Mi Bario, ta afirmá esaki. Sra. Pieter – Ogenia ta indiká un otro aspekto di e problemátika aki: “Durante enkuentronan familiar e hende grandi ta haña tin biaha inkonsientemente e sentimentu ku e no ta realmente konta mas. Ta stèmpel su ideanan komo antikuá òf e desaroyonan ta bai asina lihé ku ta bira difísil pa e keda den paso ku tur kos. Bo ta ripará ku un persona asina ta bira mas ketu,” Pieter - Ogenia ta bisa. “E hende grandi ta bai kuida su mes ménos i tin bes ta bira kombensí ku no tin masha kos mas pa e saka for di bida.”

Hopi biaha miembronan di famia no ta konsiente di e desaroyonan aki. Tòg subi di edat no ta nifiká ku outomátikamente un hende ta resultá den isolamentu sosial. Hopi hende grandi ta haña maneranan nobo pa mantené konekshon – hopi bes mas simpel ku nos ta pensa. Sr. Lanoy ta un bunita ehèmpel di esaki. Lanoy a lanta den un famia musikal. E i su ruman hòmbernan a toka añanan largu den diferente banda riba e isla. Tabata tempunan di fiesta ku muzik di ka’i òrgel i baile na Club di Shell. El a traha durante hopi aña komo loodgieter i a hasi diferente trabou pa Fundashon Birgen di Rosario. “Ku e edat aki, mi no ta sali bai balia mas,” Lanoy ta bisa. “Mi no ta haña ku esaki ta pas mas. Pero mi ta trahando sí ketu bai komo loodgieter.” E ta hasi uso sabí di su ret di ántes. Na e toko e ta topa ku su konosínan bieu i regularmente ta sali un djòp chikitu for di e enkuentronan aki. “Mi no ta hasi trabou pisá mas – esei mi ta laga pa otro, pero djòpnan leve ta tene mi mental i físikamente skèrpi.” Na kas tambe e ta sòru pa bida keda den kas. Regularmente e ta organisá un happy hour òf e ta invitá famia i amigunan pa hasi barbecue. Ta momentunan simpel, pero nan ta tene e ret sosial bibu.

Djaweps ta sagrado

No ta tur hende grandi sinembargo tin un aktitut proaktivo òf tin un ret sosial ámplio di pasado manera Lanoy. For di e realidat ei e proyekto Huntu Grandi Den Mi Bario a surgi. E proyekto a originá ora ku e anterior hefe di kuido di Fundashon Birgen di Rosario a ripará ku hopi hende grandi den e barionan alrededor tabata biba di forma isolá. E idea tabata simpel: trese hendenan di den bario huntu. E inisiativa a kuminsá e tempu ei ku donashon di Fundashon Nos Ansiano Foster Plan i despues donashon di Samenwerkende Fondsen Cariben, pero mientrastantu ta drai pa gran parti independiente, danki na kontribushonnan chikitu di e parisipantenan i ku aporte di boluntario.

Djaweps a bira un dia sagrado den siman pa e partisipantenan. Tur siman mas o ménos sesenta 60+, ku ta biba riba nan mes na kas, ta bini huntu na Hòfi Wayaká na Habaai. Nan ta lesa korant huntu, ta skucha muzik òf ta hunga wega di mesa, nan ta move i papia ku otro. Hopi bes nan ta balia tambe. “Mas importante ta e libertat,” Pieter-Ogenia ta bisa. “E grandinan mes ta stipulá kiko nan ke hasi i nan ta planeá nan palabrashonnan rondó di esaki.” Banda di e libertat aki, un parti di e forsa di Huntu Grandi Den Mi Bario ta sintá den e kushiná huntu i kome huntu. Tur siman ta kome huntu i un biá pa luna e partisipantenan mes ta kushiná. Nan ta trese ingrediente i huntu ta prepará e kuminda. Aki ta interkambiá reseta, papia di rekuerdo i sera amistatnan nobo.

Loke ta hala mas atenshon di Pieter-Ogenia komo boluntario i ta hasi su trabou komo boluntario asina spesial, ta e kambio ku e ta mira serka e hende grandinan. Hopi di e grandinan ku ta bini pa promé biaha, tin un aktitut reservá na kuminsamentu. Tin di nan ku tin miedu di kai den un programa estrikto. Pero e sintimentu aki ta disparsé lihé. “Si nan keda sinta na kas nan tin tur sorto di dolor i keho. Pero asina ku nan yega aki, nan no tin molèster di nada mas,” Pieter - Ogenia ta bisa harí. “Den e grupo e grandinan ta ripará ku nan ideanan ta bon biní. Nan ta sinti ku ainda nan por kontribuí ku algu – segun nan propio tèmpo i segun lokual ku nan mes por. Tin partisipante ku ta hasi awor ménos bishita na nan dòkter di kas. Nan tin gana atrobe den bida,” segun Pieter-Ogenia.

Skucha e entrevista di sra. Pieter - Ogenia riba nos página di Facebook!

E sintimentu aki – esta ku bo ta nesesario i ku bo konosementu tin balor – por tin un impakto enorme riba e balor propio di un hende. Hendenan ta animá. Nan ta bolbe bai kuida nan mes. “Asina un partisipante tabatin gana pa deklamá poesia riba djaweps,” Pieter-Ogenia ta konta. “El a sali en buska di un konosí di dje ku ántes tabata skirbi poema. Asina a restablesé e konekshon ei i a logra trese e persona ei tambe huntu ku otro hende grandi.”

E enkuentronan no tin solamente impakto riba e grandinan mes. “Kuidadónan informal ta konta ku diripiente mama ta trese ideanan nobo dilanti,” Pieter-Ogenia ta agregá. “Por ehèmpel pa bai laman ku famia un dia, miéntras ku anteriormente nan lo no a hasi esaki.” Pa e kuidadónan informal esaki ta nifiká ku nan sa ku nan mayor òf ser kerí ta den un ambiente seif riba djaweps. Esaki ta duna espasio pa nan mes kue un tiki rosea.

Intimidat ta kambia, pero e no ta disparsé

E aktitut proaktivo di Lanoy tin tambe influensia positivo riba bida di su esposa. Su señora di 75 aña di edat tabatin diferente problema di salú e último añanan. E ta dialisá i 10 aña pasá a hasi un operashon di kurason. Aunke ku mientrastantu el a kue forsa, su salú ketu bai ta pidi atenshon. Un aktividat chikitu, pero signifikante, ta ku Lanoy ta kore bai tur kaminda ku su esposa riba e dianan ku e no ta dialisá. Por ehèmpel nan ta bai supermerkado, na unda Lanoy ta keda warda ku pasenshi miéntras ku nos ta hibando e kombersashon aki. E manera ku Lanoy ta kuida su kasá, i e manera ku partisipantenan di Huntu Grandi Den Mi Bario ta para kla pa otro, tambe ta un forma di intimidat.

Tòg intimidat i seksualidat serka hende grandi hopi biá ta keda tópikonan tabú. Asina Pieter-Ogenia ta indiká di ta preferá pa no papia riba e tópiko aki. Lanoy ta hasi wega tokante su ruman hòmber ku a nase fuera di matrimonio, pero e kombersashon no ta yega mas leu. Meskos ku e manera ku nos ta hasi kontakto ku otro, segun nos ta bira grandi, e forma di intimidat tambe ta kambia. Unda ku ántes kisas e tabata drai rònt di pashon i seksualidat, despues e ta bai mas tantu pa kuido, atenshon i kompaño. Tòg ta resultá for di kombersashon ku diferente habitante di Fundashon Birgen di Rosario ku seksualidat por keda importante na edat mas haltu. Asina señor Whiteman ta konta ku ainda e ta seksualmente aktivo i ta nota ku e tin un otro forma kompará ku ántes. Un kuidadó di hende grandi na Fundashon Birgen di Rosario tambe ta konfirmá ku tin lugá na unda habitantenan ta buska kontakto íntimo ku otro.

Skucha nos klientenan mes na palabra tokante di e tema di seksualidat via nos página di Facebook!

Pasonan chikitu ku impakto grandi

Lanoy i Pieter-Ogenia ta mustra ku keda konektá ta kuminsá hopi bes ku pasonan chikitu: un kombersashon na un toko, un enkuentro semanal òf komementu huntu. Pa medio di e momentunan chikitu aki e grandinan mes ta saka otro for di isolamentu. Ta opvio ku nos komo komunidat mester traha duru ainda pa kontradisí soledat i hasi posibel pa papia riba tópikonan tabú manera seksualidat bou di hende grandi. Den e aspekto ei tambe kambio ta kuminsá ku pasonan chikitu. Fundashon Birgen di Rosario a dal e promé paso dor di organisá un charla tokante soledat, intimidat i seksualidat bou di hende grandi dia 26 di mart 2026 i mas inisiativa lo sigui.

Tin bes konekshon ta kuminsá simplemente ku un enkuentro, kaminda un kombersashon kòrtiku ta kuminsá entre dos hende ku kisas a kaba di konosé otro. I presis ei ta kaminda hopi biaha algu nobo ta kuminsá.