07 Apr Uni forsa pa grandinan

E hóben Ian van der Wurff a kuminisá rekoudá fondo den febrüari 2020 pa grandinan di Kòrsou i Boneiru. Dor di su partisipashon na ‘triatlon’ Ironman, ku sigun plan lo tuma lugá riba 21 di yüni na Alemania, e hòben aki di 20 aña tin komo meta pa rekoudá por lo ménos €5000. Te ku ainda a generá €2000 i Ian ta hasi un petishon na komunidat pa hasi mas donashon online òf den e tiendanan di Multimart.

Ian a haña su inspirashon di un amigu di su primu ku kier a desaroyá mas konsientisashon pa problemanan mental bou di hóben. E amigu aki a partisipá na ‘triatlon’ Ironman pa rekoudá fondo pa e bon kousa aki. Esaki a inspirá Ian pa e tambe trein pa e ‘triatlon’ aki i rekoudá fondo pa un bon kousa: kual ta Fundashon Birgen di Rosario na Kòrsou i e proyekto ‘Maatjes voor ouderen’ na Boneiru. “Fo’i chikí mi gusta hende grandi i mi ke duna algu na e generashon ku a kontribuí na e desaroyo di e islanan. Mi ta yòn i mi ta sinti mi vital, pesei mi ta skohe pa hasi deporte pa un bon kousa. Ban uni forsa pa grandinan!”, Ian ta splika. Komunidat por duna un aporte ku un donashon finansiero via e wèpsait Whydonate.nl (https://bit.ly/2Thz4ie) òf e kaha di donashon den e tiendanan di Multimart na Kòrsou i Boneiru. Kompanianan tambe por aserká Multimart pa bira sponsor i haña e oportunidat pa pone nan logo riba e ünifòrm di deporte ku Ian lo bisti durante e kompetensia Ironman. Por duna un kontribushon te ku 22 di yüni.

Ian van der Wurff a nase na Kòrsou i e ta biba na Hulanda fo’i su 5 aña. Aunke e a biba kasi henter su bida na Hulanda, ainda Ian tin Kòrsou den su kurason. El a kore stazje den e Departamentu di Merkadeo na Multimart Curaçao i pa un par di siman el a traha kom stazjère na Building Depot tambe. Ocho luna pasá e hóben aki a kuminsá trein duru pa Ironman, kual ta konsistí di 3,8 km di landamentu, 180 km di korementu di baiskel i 42 km di ‘hardlopen’ dentro 17 ora. Tur dia e ta trein for di 5’or di mainta i anochi despues di trabou. En total e ta hasi deporte pa mas o ménos 20 ora pa siman. Ta posibel pa wak partisipashon di Ian na Ironman ‘live’ via e wèpsait di Ironman. Su number di partispashon e lo anunsiá 20 di yüni riba e página di Facebook di Multimart.