Tafeltje Dekje

Fundashon Bírgen di Rosario ta ofresé tur hende, independiente di nan edat, e posibilidat pa hasi uzo di e servisio di kuminda, yamá Tafeltje Dekje. E servisio di kuminda akí riba petishon ta entregá tur dia kuminda sabroso i balansá na kas, establesimentu i institushon rònt Kòrsou.

Kua ta e bentahanan di Tafeltje Dekje?

• Kuminda variá i nutritivo;
• Tambe pa vegetariano & diferente dieta;
• Servisio flèksibel i pagabel;
• Kushina i personal di kushina profeshonal.

Tur siman bo tin eskoho for di un menú variá for di kushina kurasoleño i internashonal, ku ta konsistí di kuminda dushi i ku hopi vitamina. Si bo tin deseo spesial, tin alergia òf un dieta, bo por indiká esaki mesora ora bo pidi pa Tafeltje Dekje. Ademas bo mes por disidí kuantu biaha i ki ora bo ke bestèl. Gastunan pa uzo di e servisio di kuminda akí ta NAf 12,50 pa biaha (inkluso gastu di transporte) i pago ta sosodé delantá pa medio di un transferensia via banko.

E personal di kushina di Fundashon Birgen di Rosario tin un karchi di kùr bálido di Geneeskundige en Gezondheidsdienst (G.G.D.), ku anualmente ta renobá. Regularmente Inspekshon di Salubridat ta kontrolá e Kushina Sentral, kaminda kada dia ta prepará e kumindanan. E Kushina Sentral i e departamentu di Servisio Fasilitario ta traha estrechamente ku otro, asina por entregá tur kuminda kayente na tempu entre mitar di 12 i 1 or di mèrdia.