Nos Lanterno

Nos Lanterno a habri su portanan 17 di novèmber 1985 i tin komo meta pa duna kuido, reaktivashon i guia sosial na hendenan grandi for di 60 aña pa promové kalidat di nan bida riba tereno físiko, mental i sosial.

Na aña 2013, e Fundashon a tuma maneho di Konbento Alverna di Sùrnan di Roosendaal ku ta keda pegá. Fundashon Birgen di Rosario a asistí e Kongregashon den renobashon di e konbento. Di e manera akí, e Fundashon por ofresé akomodashon na hende grandi independiente ku ke biba, huntu ku otro, pero tòg independientemente. Si ta nesesario i deseá, grandinan por hasi un apelashon riba kuido médiko i di enfermeria via Nos Lanterno.

Nos Lanterno ta duna kuido na hende grandi, dependé di e nesesidat spesífiko pa kuido. Tin hende grandi ku tin sierto grado di independensia i pa e motibu ei no ta kompletamente dependiente di kuido, miéntras otronan tin mester di asistensia i kuido spesífiko. Ta pone e grandinan ku ta sufri di Alzheimer òf un otro forma di demensia den ún di nos departamentunan sikogeriátriko, ku ta adaptá na e nesesidatnan spesial di e habitantenan akí.

Fundashon Birgen di Rosario tin un Servisio Médiko ku dòkter i enfermera kapas, bou di nan un spesialista pa hende grandi, ku tur dia ta den e kas pa duna kuido. Habitantenan di Nos Lanterno por hasi uzo di un oferta di kuido kompleto, ku ta konsistí di fisioterapia, terapia di egersisio i pedikür médiko di parti di profeshonalnan.

Tur djadumingu, habitantenan i nan famia por asistí na Santu Sakrifisio di Misa den e Kapèl na Konbento Alverna. Ademas guianan di aktividat ta organisá diariamente aktividat, manera entre otro obra di man, landamentu, gemnastik, músika i aktividat spesial rònt i riba dianan di fiesta. Sierto aktividat na Nos Lanterno ta tuma lugá pafó di e kas. Tambe tin biaha ta selebrá eventonan ku otro kas.

Tur aña ta organisá un Dia di Famia, kaminda habitantenan por pasa e dia akí ku nan sernan kerí. E dia akí ta permití pa famia trese un plato faborito di e grandi pa parti esaki ku nan mes famia òf ku otro grandinan.